1 Corinthians 6
Di halahala di tonu
1Maa tangada bolo ia e halahala ono donu i baahi dono duaahina dama a Christ, e aha dela e hana e dau i di gowaa hai gabunga o digau o di bouli, de ga halahala adu ono donu gi baahi nia dama a God? 2Goodou e de iloo bolo nia daangada a God le hagi aga henuailala? Maa goodou ga hagi aga henuailala, malaa goodou hagalee e mee di hagi aga nia mee hagalligi? 3Goodou e de iloo bolo gidaadou ga hagi aga digau di langi? Ma e hai beenei, gidaadou e mee hua di hagi aga nia mee o di mouli nei. 4Maa nia mee beelaa ga kila aga, goodou e mee di wanga nia gabunga aanei e hagamodu go digau ala nadau hadinga ai i lodo di nohongo dabu? 5Haga langaadia dangada! Ma tangada kabemee hua i godou mehanga e mee di hagahumalia di lagamaaloo dela i mehanga nia dama a Christ ai? 6Gei dolomeenei , tama a Christ e kae dono duaahina gi di gowaa hai gabunga, e gabunga i baahi digau de hagadonu. 7Maa goodou ga halahala godou donu i godou mehanga, e haga modongoohia aga bolo di mee e hala i godou mehanga. Ma hagalee e humalia adu gi goodou, maa goodou ga diiagi hua godou donu, ga haga balumee? Hagalee e humalia adu gi goodou maa tangada ma ga gaiaa goodou? 8Gei deeai, goodou e haihai hua nia mee hala i godou mehanga, goodou e gaiaa i godou mehanga, e gaiaa labelaa nia dama a Christ! 9Goodou e de iloo bolo digau huaidu le e deemee di hai mee gi Tenua o God? Goodou hudee halahalau ina goodou: digau ala e hai be di manu, be e daumaha ang gi nia balu god, be e manawa hai be di manu, be e hai di huaidu taane gi taane, 10be e gaiaa, be e hagagailaa gi nia goloo, be e hiigeina tagao, be e hai kai tilikai, be e lobodi mee, digau huogodoo aanei hagalee loo e hai mee gi Tenua o God. 11Hunu gau i goodou nogo hai be digau aanei i mua, gei dolomeenei, gei goodou gu madammaa gi daha mo godou huaidu, gu hagadabu ang gi God, gei gu donu i baahi o God i di ingoo o tadau Dagi go Jesus Christ mo di Hagataalunga o tadau God.Hai hegau gi godou huaidina e hagamadamada a God
12Tangada ga helekai, “Gu dumaalia mai gi heia di ingoo hua di mee.” Uaa, malaa nia mee huogodoo la hagalee humalia adu gi di goe. Au e mee di helekai bolo au gu dumaalia ginai gi heia di ingoo hua di mee, gei au hagalee hai dahi mee gi heia au di hege ni oono. a 13Gei tangada e mee di helekai labelaa, “Nia meegai la ang gi tinae, gei tinae la ang gi nia meegai.” E donu, malaa, God ga hagalawa nia mee e lua aanei. Tuaidina hagalee hai hegau gi di hai be di manu, e hai hegau gi Tagi, gei Tagi e madamada humalia i tuaidina. 14God ne haga mouli aga Tagi mai i di made, gei go mee ga haga mouli aga gidaadou labelaa gi ono mogobuna.15Goodou e iloo bolo godou huaidina la nia baahi ni tuaidina o Christ? Malaa, au e mee di kae di baahi tuaidina o Christ ga hagabuni gi tuaidina o di ahina huihui dono huaidina! Deeai! E deemee loo! 16Goodou e de iloo bolo taane ma ga hagabuni dono huaidina gi tuaidina o di ahina huihui dono huaidina, la ga hai tuaidina hua e dahi? Di Beebaa Dabu e helekai madammaa, “Meemaa dogolua gu hai tuaidina hua e dahi.” b 17Gei tangada dela e hagabuni ang gi Tagi, geia gu madalia a mee gu hai di hagataalunga e dahi. 18Goodou gi haga mogowaa gi daha mo di hai be di manu. Nia huaidu huogodoo ala e hai go tangada, le e hai hua laa daha mo tuaidina, gei tangada dela e hai di huaidu be di manu, ia e hai hua di huaidu ang gi donoo huaidina. 19Goe e de iloo bolo doo huaidina la di hale daumaha ni di Hagataalunga Dabu dela e noho i oo lodo, ne gowadu gi di goe go God? Goodou hagalee ni godou huaidina, goodou ni God. c 20Go mee dela ne hui goodou gi di hui damanaiee. Deenei laa, goodou gi hai hegau gi godou huaidina, e haga madamada ai God.
Copyright information for
KPG